દિલ્હીમાં ઠંડીના કહેર વચ્ચે વધતા પ્રદૂષણને કાબૂમાં લેવા માટે BS3 પેટ્રોલ અને BS4 ડીઝલ કારના સંચાલન પર શુક્રવાર સુધી પ્રતિબંધ લગાવી દેવામાં આવ્યો છે.
નવી દિલ્હી: ઠંડીના પ્રકોપ વચ્ચે દિલ્હીમાં વધતા પ્રદૂષણને કાબુમાં લેવા માટે BS3 પેટ્રોલ અને BS4 ડીઝલ કારના સંચાલન પર શુક્રવાર સુધી પ્રતિબંધ મુકવામાં આવ્યો છે. સોમવારે દિલ્હીની હવાની ગુણવત્તા પ્રતિકૂળ હવામાન પરિસ્થિતિઓને કારણે ગંભીર સ્થિતિમાં પહોંચી ગઈ હતી. જે પછી કમિશન ફોર એર ક્વોલિટી મેનેજમેન્ટ (CAQM) એ તમામ NCR રાજ્યોને પ્રદૂષણ વિરોધી પગલાં વધુ કડક રીતે લાગુ કરવા નિર્દેશ આપ્યો હતો.
પરિવહન વિભાગના એક વરિષ્ઠ અધિકારીએ જણાવ્યું હતું કે BS-III પેટ્રોલ અને BS-IV ડીઝલ વાહનો પર પ્રતિબંધ મંગળવારથી અમલમાં આવશે કારણ કે હવાની ગુણવત્તા ગંભીર શ્રેણીમાં ખરાબ થઈ ગઈ છે. અમે પર્યાવરણ વિભાગ સાથે પરિસ્થિતિ પર નજર રાખી રહ્યા છીએ. તેમણે એમ પણ કહ્યું કે જો હવાની ગુણવત્તા સુધરે તો શુક્રવાર પહેલા પણ પ્રતિબંધ હટાવી શકાય છે.
તમને જણાવી દઈએ કે રાષ્ટ્રીય રાજધાનીમાં 24 કલાકનો સરેરાશ હવા ગુણવત્તા સૂચકાંક (AQI) સોમવારે સાંજે 4 વાગ્યે 434 હતો, જે રવિવારના 371 કરતા વધુ ખરાબ હતો. 201 અને 300 ની વચ્ચેનો AQI ‘નબળી’, 301 અને 400ને ‘ખૂબ જ નબળી’ અને 401 અને 500ને ‘ગંભીર’ ગણવામાં આવે છે.
