વીજ વાયરો અંડરગ્રાઉન્ડ કરવાનું 50% કામ પૂર્ણ, 180 કરોડના ખર્ચે કામ ચાલુ
અયોધ્યાઃ અયોધ્યામાં એક તરફ ભવ્ય શ્રી રામ જન્મભૂમિ મંદિરનું નિર્માણ ઝડપથી ચાલી રહ્યું છે, તો બીજી તરફ શહેરને સુંદર બનાવવાનું કામ પણ પૂર ઝડપે ચાલી રહ્યું છે. આ ક્રમમાં, અયોધ્યા શહેરમાં અવ્યવસ્થિત રીતે ફેલાયેલા ઇલેક્ટ્રિક વાયરને અંડરગ્રાઉન્ડ કરવાનું કામ પૂરજોશમાં ચાલી રહ્યું છે. અધિકારીઓના જણાવ્યા અનુસાર જૂન 2023 સુધીમાં અયોધ્યા શહેરને વાયરોના જાળામાંથી મુક્તિ મળી જશે.
179.60 કરોડના ખર્ચે વાયરો અન્ડરગ્રાઉન્ડ કરવાની કામગીરી કરવામાં આવી રહી છે. ઊર્જા મંત્રાલય, NTPC ટાંડા અને અયોધ્યા જિલ્લા વહીવટીતંત્ર દ્વારા ‘ઉજ્જવલ ભારત, ઉજ્જવલ ભવિષ્ય પાવર 2047’ કાર્યક્રમ હેઠળ, પાવર કેબલને અંડરગ્રાઉન્ડ કરવામાં આવી રહ્યા છે. આ કામમાં એરિયલ બંડલ્ડ કેબલ (ABC) નાખવાનું કામ ઓક્ટોબર સુધીમાં જ પૂર્ણ કરવામાં આવશે. આ સિવાય ઉજાલા યોજના હેઠળ અયોધ્યામાં અત્યાર સુધીમાં 3,81,536 LED લાઇટનું વિતરણ કરવામાં આવ્યું છે. તેના કારણે વીજ માંગમાં 20.22 મેગાવોટનો ઘટાડો થયો છે. આ સાથે વિભાગને 19 લાખ રૂપિયાની બચત પણ મળી છે.
એક્ઝિક્યુટિવ એન્જિનિયર પ્રદીપ કુમાર વર્માના જણાવ્યા અનુસાર, અંડરગ્રાઉન્ડ કેબલ નાખવાનો કુલ ખર્ચ લગભગ 180 કરોડ રૂપિયા છે. અત્યાર સુધીમાં અમે લગભગ 50 ટકા કામ પૂર્ણ કરી લીધું છે. અમે જૂન 2021માં ઇન્ટિગ્રેટેડ પાવર ડેવલપમેન્ટ સ્કીમ (IPDS) સ્કીમનું કામ શરૂ કર્યું હતું, જે જૂન 2023 સુધીમાં પૂર્ણ કરવાનું લક્ષ્ય છે. અમે કામની પ્રગતિ જોવા માટે દર અઠવાડિયે બુધવારે સમીક્ષા બેઠકો યોજીએ છીએ. તેમણે કહ્યું કે આગળના કામમાં રામપથ ધામને પહોળા કરવાની સાથે અંડરગ્રાઉન્ડ કેબલ નાખવામાં આવશે. આને શક્ય તેટલી વહેલી તકે પૂર્ણ કરવાનું લક્ષ્ય છે.
અધિકારીના જણાવ્યા અનુસાર, અંડરગ્રાઉન્ડ કેબલિંગ ઉપરાંત, સૌભાગ્ય યોજના તબક્કા-1 હેઠળ રૂ. 61.80 કરોડના ખર્ચે 2,556 આવાસોનું વિદ્યુતીકરણ કરવામાં આવ્યું છે. જેમાં 1,02,487 ઘરોને જોડીને રોશની કરવામાં આવ્યા છે. તેમાંથી 37,239 BPL પરિવારોનો સમાવેશ કરવામાં આવ્યો છે. આ ઉપરાંત સૌભાગ્ય યોજના તબક્કો-2 હેઠળ રૂ. 10.27 કરોડના ખર્ચે 147 ઘરોમાં વીજળીકરણ કરીને 13,260 ઘરોને રોશની કરવામાં આવ્યા છે. જેમાં 807 BPL પરિવારોનો સમાવેશ કરવામાં આવ્યો છે.
તેમણે કહ્યું કે જે ઘરો માટે વીજ લાઈનો બાંધવી અને કનેક્શન આપવાનું શક્ય નહોતું, તેવા ઘરોને સૌભાગ્ય યોજના હેઠળ જ સોલાર પાવર પેક (સૌર ઉર્જા)થી પ્રકાશિત કરવામાં આવ્યા છે. જિલ્લામાં આવા 470 ઘરોમાં સૌર ઉર્જાથી રોશની કરવાની કામગીરી પૂર્ણ કરવામાં આવી છે.
