G7 દેશોના નેતાઓએ ‘જ્યાં સુધી જરૂરી હોય ત્યાં સુધી’ યુક્રેનને ટેકો આપવા માટે સંયુક્ત વલણ અપનાવ્યું હતું અને કહ્યું હતું કે તેઓ યુદ્ધ-ભંડોળના તેલના વેચાણમાંથી રશિયાની કમાણીને મર્યાદિત કરવા માટે દૂરગામી પગલાંની શક્યતા શોધશે.
એલમાઉ (જર્મની): વિશ્વના સૌથી ધનાઢ્ય લોકશાહી દેશોના નેતાઓએ મંગળવારે રશિયાના આક્રમણ સામે યુક્રેનને સમર્થન આપવાનું વચન આપ્યું હતું. G7 દેશોના નેતાઓએ ‘જ્યાં સુધી જરૂરી હોય ત્યાં સુધી’ યુક્રેનને ટેકો આપવા માટે સંયુક્ત વલણ અપનાવ્યું હતું અને કહ્યું હતું કે તેઓ યુદ્ધ-ભંડોળના તેલના વેચાણમાંથી રશિયાની કમાણીને મર્યાદિત કરવા માટે દૂરગામી પગલાંની શક્યતા શોધશે. સાત દેશોના આ સમૂહમાં કેનેડા, ફ્રાન્સ, જર્મની, ઈટાલી, જાપાન, બ્રિટન અને અમેરિકાનો સમાવેશ થાય છે.
જર્મનીમાં G7 સમિટ પછી બહાર પાડવામાં આવેલા નિવેદનમાં અશ્મિભૂત ઇંધણની કિંમત પરની મર્યાદા વ્યવહારીક રીતે કેવી રીતે લાગુ થશે તેની વિગતો આપવામાં આવી નથી. જૂથના સભ્ય દેશો ચોક્કસ સ્તરથી ઉપરના રશિયન તેલની આયાતને રોકવાના પગલાં લેવા માટે આગામી અઠવાડિયામાં વધુ ચર્ચા કરશે. આનાથી રશિયન આવકના મુખ્ય સ્ત્રોતને અસર થશે અને વૈશ્વિક અર્થતંત્રને અસર કરતા ઊર્જાના ભાવોથી રાહત મળશે.
નેતાઓ રશિયન સોનાની આયાત પર પ્રતિબંધો લાદવા અને કાળા સમુદ્ર દ્વારા યુક્રેનિયન અનાજ પરિવહન અટકાવવાથી પ્રભાવિત દેશોને સહાય પૂરી પાડવા સંમત થયા હતા.
