મોનસૂન અપડેટ: હવામાન વિભાગના જણાવ્યા અનુસાર, મધ્ય અને પૂર્વ ભારત તરફ દક્ષિણ-પશ્ચિમ ચોમાસાની પ્રગતિને કારણે તાપમાનમાં ઘટાડો થયો છે. તે જ સમયે, 29 જૂન સુધી ગરમીના મોજામાંથી રાહત મળે તેવી શક્યતા છે.
ભારતમાં હવામાન અપડેટ: રાષ્ટ્રીય રાજધાની દિલ્હીમાં ઝરમર વરસાદને કારણે, પારો નીચે ગયો છે અને હવામાન ખુશનુમા બની ગયું છે. જેના કારણે અહીં લોકોને કાળઝાળ ગરમીમાંથી રાહત મળી છે. જ્યારે બીજી તરફ દેશના ઉત્તર અને મધ્ય ભારતના ઘણા ભાગોમાં છેલ્લા કેટલાક દિવસોથી વધી રહેલી ગરમી બાદ હવે ચોમાસાની શરૂઆત વચ્ચે તાપમાનમાં ઘટાડો જોવા મળી રહ્યો છે. જેના કારણે પ્રજામાં થોડી રાહત જોવા મળી રહી છે.
ભારતીય હવામાન વિભાગના જણાવ્યા અનુસાર, એવી આગાહી કરવામાં આવી છે કે 23 જૂનથી 29 જૂનની વચ્ચે દક્ષિણ પશ્ચિમ ચોમાસું ઉત્તર પશ્ચિમ ભારત અને મધ્ય ભારતના ઘણા વિસ્તારોને આવરી લેશે. IMD દ્વારા ગુરુવારે કહેવામાં આવ્યું હતું કે દેશના તમામ ભાગોમાં હીટવેવ (લૂ)ની અસર હવે સમાપ્ત થઈ રહી છે. IMD અનુસાર, દક્ષિણ પશ્ચિમ ચોમાસું હવે મધ્ય અને પૂર્વ ભારત તરફ આગળ વધી રહ્યું છે. આ કારણે પશ્ચિમી વિક્ષેપ ઉત્તર-પશ્ચિમ વિસ્તારને અસર કરી રહ્યો છે.
29 જૂન સુધી ગરમીથી રાહત મળશે
હાલમાં, IMD અનુસાર, 16 જૂનથી હીટવેવની સ્થિતિ સમાપ્ત થઈ ગઈ છે. મધ્ય અને પૂર્વ ભારત તરફ દક્ષિણ-પશ્ચિમ ચોમાસું આગળ વધવાને કારણે, હવે ઉત્તર-પશ્ચિમ અને મધ્ય ભાગોમાં મહત્તમ તાપમાનમાં 5 થી 10 ડિગ્રી સેલ્સિયસનો ઘટાડો થયો છે. આ સાથે જ IMDનું અનુમાન છે કે 29 જૂન સુધી દેશના કોઈપણ ભાગમાં કોઈ પણ પ્રકારની હીટવેવની શક્યતા નથી.
ગરમીનું મોજુ 15 જૂન સુધી ચાલ્યું હતું
IMD (ભારત હવામાન વિભાગ) અનુસાર, 2 જૂનથી ઉત્તર પશ્ચિમ ભારત અને 10 જૂનથી મધ્ય ભારત ગરમ અને સૂકા પશ્ચિમી પવનોને કારણે હીટવેવની પકડમાં હતું. જેના કારણે લોકોને ભારે મુશ્કેલીનો સામનો કરવો પડ્યો હતો. IMD અનુસાર, 15 જૂન સુધી દિલ્હી, દક્ષિણ હરિયાણા, દક્ષિણ-પૂર્વ ઉત્તર પ્રદેશ અને પશ્ચિમ હિમાલયના વિવિધ ભાગોમાં હીટ વેવની સ્થિતિ જોવા મળી હતી.