આઈડિયાઝ ઓફ ઈન્ડિયા સમિટ 2023: યુકેના ભૂતપૂર્વ પીએમ લિઝ ટ્રુસે એબીપી નેટવર્કના બે દિવસીય કાર્યક્રમ ‘આઈડિયાઝ ઓફ ઈન્ડિયા સમિટ 2023’માં ભાગ લેતી વખતે ભારતની પ્રશંસા કરી.
આઈડિયાઝ ઓફ ઈન્ડિયા સમિટ 2023: યુકેના ભૂતપૂર્વ પીએમ લિઝ ટ્રુસે એબીપી નેટવર્કના બે દિવસીય કાર્યક્રમ ‘આઈડિયાઝ ઓફ ઈન્ડિયા સમિટ 2023’માં ભાગ લઈને ભારતની પ્રશંસા કરી છે. તેમણે ખુલ્લા શબ્દોમાં કહ્યું કે, બ્રિટનને પણ ભારતની જેમ ઉચ્ચ વિકાસની જરૂર છે.
લિઝ ટ્રુસે કાર્યક્રમમાં ભાગ લેતા કહ્યું કે, આપણે (બ્રિટને) ભારત પાસેથી શીખવાની જરૂર છે. અર્થવ્યવસ્થાના ક્ષેત્રમાં ભારત વિશ્વની એક મોટી શક્તિ બની ગયું છે અને તેની આર્થિક વૃદ્ધિ જોઈને બ્રિટનને પણ ઈર્ષ્યા થાય છે (લિઝે હસીને આ વાત કહી). તેમણે કહ્યું કે, ભારતીય કંપનીઓ યુકે કોર્પોરેટમાં સૌથી મોટા રોકાણકારો છે. આ કંપનીઓ દવાથી લઈને સ્ટીલ, ઈન્ફ્રાસ્ટ્રકચર સુધીની દરેક બાબતમાં રોકાણ કરી રહી છે.
ભારતનો અવાજ આખી દુનિયા સાંભળે છે – લિઝ ટ્રસ
વિશ્વમાં ભારતના વધતા કદ પર બોલતા લિઝે કહ્યું, આજે ભારત એ સ્તરે પહોંચી ગયું છે જેનો અવાજ આખી દુનિયા સાંભળે છે. અમે (બ્રિટન) ભારતમાં ભવિષ્ય માટે અમારી સૌથી મોટી આશા જોઈએ છીએ. તેમણે કહ્યું, ભારત એવો દેશ છે જે ઝડપથી આગળ વધી રહ્યો છે. એક એવો દેશ જે કામ કરવાની ક્ષમતામાં દરેક સમયે પોતાની જાતને સુધારીને આગળ વધી રહ્યો છે.
ભારત વિશ્વની સૌથી મોટી લોકશાહી છે – લિઝ ટ્રસ
યુએન સિક્યોરિટી કાઉન્સિલમાં ભારતના કાયમી સભ્યપદના પ્રશ્ન પર લિઝ ટ્રુસે કહ્યું, હું આંતરરાષ્ટ્રીય સ્તરે એક મુખ્ય ખેલાડી તરીકે ભારતની મોટી ભૂમિકાનું સમર્થન કરું છું. ભારત એક નેતા છે, વિશ્વની સૌથી મોટી લોકશાહી.
‘આઈડિયાઝ ઓફ ઈન્ડિયા સમિટ 2023’
તમને જણાવી દઈએ કે, એબીપી નેટવર્કની ‘આઈડિયાઝ ઓફ ઈન્ડિયા સમિટ 2023’ 25 ફેબ્રુઆરી સુધી ચાલશે. મુંબઈની ગ્રાન્ડ હયાત હોટલમાં તેનું આયોજન કરવામાં આવ્યું છે. આ કાર્યક્રમમાં દેશ અને દુનિયાના વિવિધ રાજકીય, સાંસ્કૃતિક અને કલા જગતની પ્રખ્યાત હસ્તીઓને એક જ મંચ પર આમંત્રિત કરવામાં આવ્યા છે. આ કોન્ફરન્સની થીમ ‘ન્યુ ઈન્ડિયાઃ લુકિંગ ઇનવર્ડ, રીચિંગ આઉટ’ છે.
